मे. आरसीसीपीएल प्रायव्हेट लिमिटेड (एम. पी. बिर्ला ग्रुप) संचालित मुकुटबन लाइमस्टोन अँड डोलोमाइट माइन्स तसेच परसोडा लाइमस्टोन माइन यांच्या पहिल्या त्रिपक्षीय सुरक्षा समितीची बैठक १० जून २०२६ रोजी नागपूर येथे उत्साहपूर्ण वातावरणात पार पडली. खाण क्षेत्रातील कामगारांची सुरक्षा, आरोग्य आणि कल्याण यांना सर्वोच्च प्राधान्य देण्याच्या उद्देशाने या बैठकीचे आयोजन करण्यात आले होते.
बैठकीला प्रमुख पाहुणे म्हणून खाण सुरक्षा महासंचालनालय (डीजीएमएस) पश्चिम विभागाचे उपमहासंचालक श्री. रामावतार मीना उपस्थित होते. तसेच आरसीसीपीएल प्रा. लि. (एम. पी. बिर्ला ग्रुप) चे उत्पादन व प्रकल्प प्रमुख श्री. रजत कुमार प्रस्ती हे विशेष पाहुणे म्हणून उपस्थित होते.
यावेळी डीजीएमएस पश्चिम विभाग व नागपूर विभाग-२ मधील वरिष्ठ अधिकाऱ्यांनी सहभाग नोंदविला. यामध्ये संचालक (खाणकाम) श्री. डी. एस. साळवी, संचालक (यांत्रिक) श्री. बाळकृष्ण पदार्थ, संचालक (इलेक्ट्रिकल) श्री. अर्का धुलिपाला सोमयाजुलु, उपसंचालक (यांत्रिक) श्री. उमेश कुमार साहू आणि उपसंचालक (खाणकाम) श्री. के. श्रीनिवास यांचा समावेश होता.
आरसीसीपीएलच्या वतीने युनिट प्रमुख श्री. सुनील सूद, कॉर्पोरेट मायनिंग हेड श्री. सूरज गुप्ता, खाण विभाग प्रमुख श्री. के. के. राठोर तसेच त्यांच्या सहकाऱ्यांनी सक्रिय सहभाग घेतला. कामगार प्रतिनिधी श्री. परितोष गुंडावर, श्री. साई कन्स्ट्रक्शनचे प्रतिनिधी आणि कर्मचारी वर्गही बैठकीला उपस्थित होते.
सभेला संबोधित करताना श्री. रामावतार मीना यांनी खाण उद्योगात सुरक्षा संस्कृती अधिक बळकट करण्याची आवश्यकता अधोरेखित केली. व्यावसायिक सुरक्षा, आरोग्य आणि कामाची परिस्थिती (केंद्रीय) नियम २०२६ चा संदर्भ देत त्यांनी सांगितले की, कामगारांची सुरक्षा ही केवळ कायदेशीर जबाबदारी नसून नैतिक व मानवी कर्तव्यदेखील आहे.
सुरक्षित कार्यपद्धती, धोक्यांची वेळेत ओळख, नियमित प्रशिक्षण, सुरक्षा उपकरणांचा अनिवार्य वापर आणि आरोग्यविषयक सुविधा यांची प्रभावी अंमलबजावणी करण्यावर त्यांनी विशेष भर दिला. तसेच सुरक्षा ही कागदोपत्री न राहता प्रत्यक्ष कृतीत दिसली पाहिजे, असे स्पष्ट करत महिलांच्या सहभागाला प्रोत्साहन देण्यासाठी सुरक्षित, सन्मानजनक व सर्वसमावेशक कार्यपरिसर निर्माण करण्याचे आवाहनही त्यांनी केले.
विशेष पाहुणे श्री. रजत कुमार प्रस्ती यांनी व्यवस्थापनाच्या वतीने कामगारांच्या सुरक्षिततेला आणि कल्याणाला सर्वोच्च प्राधान्य दिले जाईल, अशी ग्वाही दिली. खाणींमध्ये सुरक्षित कामकाजाची परिस्थिती निर्माण करण्यासाठी आणि सर्व सुरक्षा मानकांचे काटेकोर पालन करण्यासाठी कंपनी कटिबद्ध असल्याचे त्यांनी सांगितले.
बैठकीत उपस्थित अधिकारी, व्यवस्थापन प्रतिनिधी आणि कामगार प्रतिनिधींनी ‘शून्य अपघात’ ध्येय, सुरक्षित कार्यसंस्कृती, संवादाधारित व्यवस्थापन आणि कामगार कल्याणाच्या उपाययोजनांवर भर दिला. सुरक्षित, निरोगी आणि आत्मविश्वासपूर्ण वातावरणात काम करणारे मनुष्यबळ हेच कोणत्याही संस्थेच्या प्रगतीचे खरे बळ असल्याचे मत यावेळी व्यक्त करण्यात आले.
पहिल्या त्रिपक्षीय सुरक्षा समितीच्या बैठकीमुळे डीजीएमएस, व्यवस्थापन आणि कामगार प्रतिनिधींमध्ये सकारात्मक व विधायक संवाद प्रस्थापित झाला. यामुळे खाणींमधील सुरक्षा मानके अधिक प्रभावी करणे, कामगारांचे कल्याण बळकट करणे आणि पारदर्शक कामकाजाला चालना देण्यासाठी महत्त्वपूर्ण मार्गदर्शन मिळाले.
ही बैठक आरसीसीपीएल प्रा. लि. (एम. पी. बिर्ला ग्रुप) यांच्या खाण क्षेत्रातील सुरक्षा, आरोग्य आणि कामगार कल्याणाप्रती असलेल्या दृढ वचनबद्धतेचे उत्कृष्ट उदाहरण ठरली.