🚍 ठप्प बससेवा पुन्हा सुरू करण्याची मागणी; माजी जि.प. सदस्य विजय पिदुरकर यांचे आमदार मुनगंटीवारांना निवेदन

स्टिंग ऑपरेशन न्यूज | वणी

 चंद्रपूर–घुग्घूस–नकोडा–साखरा–शिंदोला–मोहदा–कृष्णानपूर–मुकुटबन या महत्त्वाच्या एसटी बससेवेची पूर्ववत सुरुवात करण्यात यावी, अशी मागणी माजी जिल्हा परिषद सदस्य विजय पिदुरकर यांनी बल्लारपूर विधानसभा मतदारसंघाचे आमदार सुधीरभाऊ मुनगंटीवार यांच्याकडे निवेदनाद्वारे केली आहे.

निवेदनात नमूद करण्यात आले आहे की, चंद्रपूर आगाराच्या वतीने चालविण्यात येणारी ही बससेवा दोन जिल्ह्यांतील विद्यार्थी, महिला, शेतकरी, कामगार आणि लहान व्यावसायिकांसाठी अत्यंत उपयुक्त ठरत होती. मात्र, वणी तालुक्यातील मुंगोली येथील वर्धा नदीवरील पूल नादुरुस्त झाल्याने सन २०२३ पासून ही सेवा बंद करण्यात आली होती.

आता मुंगोली येथील वर्धा नदीवरील नवीन पुलाचे काम पूर्ण झाले असून येत्या काही दिवसांत तो सार्वजनिक वाहतुकीसाठी खुला होणार आहे. त्यामुळे पूर्वीप्रमाणेच चंद्रपूर–घुग्घूस–नकोडा–साखरा–शिंदोला–मोहदा–मुकुटबन या मार्गावर एसटी बससेवा तातडीने सुरू करावी, अशी मागणी करण्यात आली आहे.

ही बससेवा सुरू झाल्यास विद्यार्थ्यांना शिक्षणासाठी, महिलांना दैनंदिन कामकाजासाठी, दिव्यांग व आजारी रुग्णांना उपचारासाठी तसेच शेतकरी, कामगार आणि छोट्या व्यावसायिकांना चंद्रपूर व घुग्घूस येथे जाणे अधिक सोयीचे आणि परवडणारे होणार आहे. त्यामुळे एसटी प्रशासनाने मार्गाची पाहणी करून लवकरात लवकर बससेवा पूर्ववत सुरू करावी, अशी अपेक्षा व्यक्त करण्यात आली आहे.

या निवेदनाची प्रत विभाग नियंत्रक, एसटी वर्कशॉप तुकूम, चंद्रपूर यांनाही पाठविण्यात आली आहे. स्थानिक नागरिकांमधूनही या मागणीला मोठा पाठिंबा मिळत असून बससेवा पुन्हा सुरू होण्याकडे सर्वांचे लक्ष लागले आहे.