🏗️ मॅकरून शाळेच्या इमारत बांधकामावर प्रश्नचिन्ह; शिवसेनेची चौकशीची मागणी

वणी | प्रतिनिधी

वणी शहरातील गंगशेट्टीवार मंगल कार्यालय परिसरात "मॅकरून शाळेच्या" नावाने उभारण्यात येत असलेल्या व्यावसायिक इमारतीच्या बांधकामाबाबत गंभीर शंका उपस्थित करत शिवसेना (शिंदे गट) पदाधिकाऱ्यांनी नगर परिषद प्रशासनाकडे तात्काळ चौकशी व कारवाईची मागणी केली आहे.

यासंदर्भात मा. मुख्याधिकारी, नगर परिषद वणी यांना निवेदन देण्यात आले. निवेदनात नमूद करण्यात आले आहे की, सदर ठिकाणी तीन ते चार मजली व्यावसायिक इमारतीचे बांधकाम वेगाने सुरू असून या बांधकामास नगर परिषदेकडून आवश्यक परवानगी मिळाली आहे की नाही, याबाबत नागरिकांमध्ये संभ्रम आणि संशय निर्माण झाला आहे.

निवेदनानुसार, महाराष्ट्र नगर परिषद, नगर पंचायती व औद्योगिक नगरी अधिनियम 1965 मधील कलम 189(2) तसेच महाराष्ट्र प्रादेशिक व नगर रचना अधिनियम 1966 मधील कलम 52 व 53 नुसार कोणतेही बांधकाम सुरू करण्यापूर्वी संबंधित प्राधिकरणाची पूर्वपरवानगी आवश्यक असून विनापरवाना अथवा नियमबाह्य बांधकामांवर कारवाई करण्याची तरतूद आहे.

शिवसेना पदाधिकाऱ्यांनी नगर परिषद प्रशासनाकडे पुढील मागण्या केल्या आहेत :

👉 संबंधित बांधकामास नगर परिषदेकडून अधिकृत परवानगी देण्यात आली आहे की नाही, याची तात्काळ चौकशी करावी.

👉 परवानगी नसल्यास अथवा मंजूर आराखड्याच्या विरुद्ध बांधकाम होत असल्यास ते त्वरित थांबवावे.

👉 संबंधित मालमत्ता धारक, बांधकाम व्यावसायिक व जबाबदार व्यक्तींवर लागू कायद्यांनुसार कठोर कारवाई करावी.

👉 चौकशी अहवाल व करण्यात आलेल्या कारवाईची माहिती लेखी स्वरूपात उपलब्ध करून द्यावी.

प्रशासनाने या प्रकरणाची निष्पक्ष व गांभीर्याने दखल घ्यावी, अन्यथा तीव्र आंदोलन छेडण्यात येईल व त्यास नगर परिषद प्रशासन जबाबदार राहील, असा इशाराही निवेदनातून देण्यात आला आहे.

निवेदन देताना शिवसेनेचे जिल्हा संघटक विजय बाबू चोरडिया यांच्यासह दिपक कोकास, प्रसाद ठाकरे, बाळू चेडे, विशाल किन्हेकर, मनिष सुरावार, शुभम गोरे, राहुल पारखी, संगीता मुरस्कर, मनिषा कोंगरे, भाग्यश्री वैद्य,  राजू खामनकर, मीनानाथ काकडे, सोनू पावडे, कपील कुंटलवार आदी पदाधिकारी व कार्यकर्ते उपस्थित होते.