🏫 शासकीय आयटीआय वणीची प्रवेश प्रक्रिया सुरू; विद्यार्थ्यांसाठी करिअरची सुवर्णसंधी!,📚 दहावी उत्तीर्ण-अनुत्तीर्ण विद्यार्थ्यांना १६ व्यवसायांमध्ये प्रवेशाची संधी,⏳ ऑनलाईन अर्जाची अंतिम मुदत २१ जून; वेळेत अर्ज करण्याचे आवाहन

वणी :

शासकीय औद्योगिक प्रशिक्षण संस्था (आयटीआय), वणी येथे शैक्षणिक वर्ष २०२६-२७ साठी विविध व्यवसाय अभ्यासक्रमांच्या प्रवेश प्रक्रियेला सुरुवात झाली असून, ऑनलाईन प्रवेश अर्ज भरण्याची अंतिम तारीख २१ जून २०२६ निश्चित करण्यात आली आहे. इच्छुक विद्यार्थ्यांनी वेळेत अर्ज करून आपल्या उज्ज्वल भविष्यासाठी ही संधी साधावी, असे आवाहन संस्थेच्या वतीने करण्यात आले आहे.

यंदा संस्थेत एकूण १४ व्यवसाय (ट्रेड) उपलब्ध असून, मुलींसाठी तीन स्वतंत्र व्यवसायांसह सर्व व्यवसायांमध्ये ३० टक्के जागा राखीव ठेवण्यात आल्या आहेत. इलेक्ट्रीशियन, वायरमन, फिटर, मेकॅनिक डिझेल, मेकॅनिक मोटार व्हेईकल, आयसीटीएसएम, वेल्डर, वूड वर्क टेक्निशियन, प्लंबर, इंटेरिअर डिझाईन अॅण्ड डेकोरेशन, कॉम्प्युटर ऑपरेटर अॅण्ड प्रोग्रामिंग असिस्टंट (COPA), ड्रेस मेकिंग, कॉस्मेटॉलॉजी आणि फॅशन डिझाईन अॅण्ड टेक्नॉलॉजी या व्यवसायांसाठी प्रवेश दिला जाणार आहे. तसेच इलेक्ट्रॉनिक्स मेकॅनिक व टेक्स्टाईल मेकॅट्रॉनिक्स हे दोन प्रस्तावित व्यवसायही उपलब्ध होण्याची शक्यता आहे.

संस्थेत रोजगाराभिमुख प्रशिक्षणाला विशेष प्राधान्य दिले जाते. २०२५ मध्ये वेस्टर्न कोलफिल्ड्स लिमिटेड (WCL) मध्ये ९० प्रशिक्षणार्थ्यांची, तर महापारेषण कंपनीत २४ प्रशिक्षणार्थ्यांची निवड झाल्याचा उल्लेख संस्थेने केला आहे. ऑन-जॉब ट्रेनिंग, नामांकित कंपन्यांचे भरती मेळावे, अॅप्रेन्टिसशिपसाठी परिसर मुलाखती आणि अनुभवी प्रशिक्षकांमार्फत दर्जेदार प्रशिक्षण ही संस्थेची वैशिष्ट्ये मानली जातात.

विद्यार्थ्यांच्या सर्वांगीण विकासासाठी एनएसएस उपक्रम, सांस्कृतिक कार्यक्रम आणि विविध व्यक्तिमत्त्व विकास उपक्रम राबविले जातात. अनुसूचित जाती-जमातीच्या विद्यार्थ्यांना मॅट्रिकोत्तर शिष्यवृत्ती तसेच ऑनलाईन प्रक्रियेद्वारे दरमहा ५०० रुपयांचे विद्यावेतन उपलब्ध करून दिले जाते. मुलींसाठी कॉस्मेटॉलॉजी हा व्यवसाय १०० टक्के राखीव असून, या क्षेत्रात रोजगाराच्या चांगल्या संधी उपलब्ध असल्याचे संस्थेने नमूद केले आहे.

प्रवेश प्रक्रियेत लक्षात ठेवावयाच्या महत्त्वाच्या बाबी :

ऑनलाईन अर्ज भरताना आधार कार्ड अद्ययावत असणे आवश्यक आहे. अर्जात स्वतःचा मोबाईल क्रमांक नोंदवून तो प्रशिक्षण पूर्ण होईपर्यंत कायम ठेवावा. अर्जाचा युजर आयडी व पासवर्ड सुरक्षित जतन करावा. ऑनलाईन शुल्क भरल्यानंतर कोणत्याही शासकीय आयटीआयमध्ये मूळ कागदपत्रांची पडताळणी करून अर्ज 'कन्फर्म' करणे बंधनकारक आहे. अर्ज कन्फर्म केल्यानंतरच व्यवसायांचे पर्याय भरता येतील आणि त्यानंतर अर्जात कोणताही बदल करता येणार नाही.

प्राचार्य संजय तेलतुंबडे यांनी विद्यार्थ्यांना वेळेत अर्ज करून कौशल्याधारित शिक्षण व रोजगाराच्या संधींचा लाभ घेण्याचे आवाहन केले आहे.

अधिक माहितीसाठी गटनिदेशक व समन्वयक आर. जी. ढबाले (९८६०४६५४१९), प्रवेश समन्वयक एस. एस. लेनगुळे (९६३७८६०५६७) तसेच संस्थेच्या संबंधित समन्वयकांशी संपर्क साधण्याचे आवाहन करण्यात आले आहे.