🐂 बैल पोळ्यानिमित्त वणीची बाजारपेठ सजली!गांधी चौकात शेतकऱ्यांची मोठी गर्दी; बैलांच्या सजावटीच्या साहित्याने बाजारपेठ फुलली

वणी :

बळीराजाचा लाडका सण म्हणून ओळखल्या जाणाऱ्या बैल पोळा सणानिमित्त वणी शहरातील मुख्य बाजारपेठ असलेल्या गांधी चौकात उत्साहाचे वातावरण निर्माण झाले आहे. पोळ्याच्या पार्श्वभूमीवर विविध साहित्यांच्या दुकानांनी बाजारपेठ सजली असून, शेतकरी बांधवांची मोठी गर्दी खरेदीसाठी होत आहे.

बैलांच्या सजावटीसाठी लागणारे रंग, गोंडे, झुली, घुंगरू, दोर, शिंगांना लावण्यात येणारे आकर्षक रंग तसेच विविध प्रकारचे सजावटीचे साहित्य बाजारपेठेत उपलब्ध झाले आहे. आपल्या लाडक्या बैलांना आकर्षक पद्धतीने सजविण्यासाठी शेतकरी आवडीने साहित्याची खरेदी करताना दिसत आहेत.

पोळ्याच्या निमित्ताने बाजारपेठेत ग्रामीण संस्कृतीचे दर्शन घडत असून, शेतकरी कुटुंबांमध्ये सणाची लगबग सुरू झाली आहे. बैलांप्रती कृतज्ञता व्यक्त करणारा हा सण उत्साहात साजरा करण्यासाठी वणी परिसरातील शेतकरी सज्ज झाले आहेत.

गांधी चौकात खरेदीसाठी शेतकऱ्यांची गर्दी

पोळ्याच्या पूर्वसंध्येला गांधी चौक परिसरात नागरिक आणि शेतकरी बांधवांची मोठी वर्दळ पाहायला मिळत आहे. त्यामुळे बाजारपेठेला सणाचे स्वरूप प्राप्त झाले असून, व्यापाऱ्यांमध्येही उत्साहाचे वातावरण आहे.