लोकमान्य टिळक महाविद्यालय, वणी येथील संस्कृत विभागप्रमुख तथा संत गाडगेबाबा अमरावती विद्यापीठाच्या संस्कृत अभ्यासक्रम मंडळाचे कार्यकारी अध्यक्ष विद्यावाचस्पती प्रा. स्वानंद गजानन पुंड यांना महाराष्ट्र शासनाच्या उच्च व तंत्र शिक्षण विभागाच्या वतीने ‘महाराष्ट्र राज्य महाकवी कालिदास संस्कृत साधना पुरस्कार’ घोषित करण्यात आला आहे. संस्कृत भाषा, साहित्य आणि संस्कृत शिक्षणाच्या प्रसारासाठी त्यांनी केलेल्या उल्लेखनीय कार्याचा हा गौरव मानला जात आहे.
प्रा. पुंड यांनी आजवर ९६ ग्रंथांचे लेखन, ३० हून अधिक ई-बुक्स, सहा पुस्तकांचे संपादन, ६ हजारांहून अधिक वृत्तपत्रीय लेख तसेच ५ हजारांहून अधिक व्याख्याने व प्रवचने केली आहेत. त्यांच्या कार्याची दखल घेत विविध मान्यवर संस्थांकडून त्यांना ३० हून अधिक पुरस्कार प्राप्त झाले आहेत. तसेच लिम्का बुक ऑफ रेकॉर्ड, नॅशनल बुक ऑफ रेकॉर्ड, इंटरनॅशनल बुक ऑफ रेकॉर्ड, इंडिया बुक ऑफ रेकॉर्ड आणि लंडन बुक ऑफ रेकॉर्ड या विक्रमपुस्तिकांमध्ये त्यांच्या विविध उपक्रमांची नोंद झाली आहे.
‘गीर्वाण वाणी’ या उपक्रमाच्या माध्यमातून प्रा. पुंड यांनी संस्कृत साहित्य सर्वसामान्यांपर्यंत पोहोचविण्याचा प्रयत्न केला आहे. त्यांच्या यूट्यूब चॅनेलवर नीतिशतकम्, मेघदूतम्, अभिज्ञानशाकुंतलम्, स्वप्नवासवदत्तम्, वेदान्तसार, भारतीय स्वयंशिक्षा पद्धती तसेच रसास्वाद व अन्योक्ती यांसारख्या विविध विषयांवरील निरूपण मालिका प्रसारित करण्यात आल्या आहेत. या उपक्रमांचा हजारो संस्कृतप्रेमी लाभ घेत आहेत.
राष्ट्रीय शैक्षणिक संसाधनांच्या धर्तीवर त्यांनी विविध विषयांवर ऑनलाइन व निःशुल्क अभ्यासक्रमही उपलब्ध करून दिले आहेत. या अभ्यासक्रमांना देश-विदेशातील संस्कृतप्रेमींकडून सातत्याने प्रतिसाद मिळत आहे.
त्यांच्या ‘रघुवंशम्’ महाकाव्यावरील लेखमालिकेची लंडन बुक ऑफ रेकॉर्डने नोंद घेतली असून, ही लेखमालिका आणखी एका विक्रमाच्या दिशेने वाटचाल करीत आहे.
संस्कृत भाषा व साहित्याच्या प्रसारासाठी सातत्याने कार्यरत असलेल्या प्रा. स्वानंद गजानन पुंड यांच्या कार्याला महाराष्ट्र शासनाच्या पुरस्काराच्या माध्यमातून मिळालेली ही मान्यता त्यांच्या कार्याचा मोठा सन्मान मानली जात आहे. ते **‘स्टिंग ऑपरेशन न्यूज’**चे स्तंभलेखक असल्याने त्यांच्या या सन्मानाबद्दल स्टिंग ऑपरेशन न्यूज परिवाराच्या वतीने त्यांचे हार्दिक अभिनंदन करण्यात येत आहे.