संकट चतुर्थीच्या पावन पर्वानिमित्त शुक्रवारी, दि. ३ जुलै २०२६ रोजी वणी येथील बसस्टँड परिसरातील नवसाचा श्री गणपती मंदिरात धार्मिक आणि सामाजिक उपक्रमांचे उत्साहपूर्ण आयोजन करण्यात आले. भक्तिमय वातावरणात श्री गणरायाची महाआरती पार पडली. त्यानंतर उपस्थित भाविकांसाठी महाप्रसादाचे आयोजन करण्यात आले.
यावेळी पर्यावरण संवर्धनाचा संदेश देत श्री गणपती बाप्पांना प्रिय असलेल्या जास्वंदाच्या रोपांसह विविध फुलझाडांचे मंदिर परिसरात वृक्षारोपण करण्यात आले. भविष्यात मंदिरात येणाऱ्या भाविकांना पूजा-अर्चेसाठी ताजी जास्वंदाची फुले उपलब्ध व्हावीत तसेच मंदिर परिसर अधिक हिरवागार आणि निसर्गरम्य व्हावा, या उद्देशाने हा उपक्रम राबविण्यात आला.
वृक्षारोपण कार्यक्रमात उपस्थित भाविकांनी उत्स्फूर्त सहभाग नोंदवत पर्यावरण संरक्षणाचा संकल्प केला. धार्मिक श्रद्धा आणि पर्यावरण संवर्धनाचा सुंदर संगम घडवून आणणारा हा उपक्रम उपस्थितांच्या विशेष कौतुकाचा विषय ठरला.
या कार्यक्रमास दीपक कोकास, सुभाष तिवारी, उपमुख्याधिकारी जयंता सोनटक्के, अशोकराव सोनटक्के, प्रमोद निकोरे, ॲड. सूरज महारतळे, भिकमचंद गोयंका, अमित उपाध्ये, अनिल बिलोरिया आदी मान्यवर उपस्थित होते. बसस्टँड परिसरातील श्री गणेश मंदिरात करण्यात आलेले हे वृक्षारोपण राजू तुराणकर यांच्या सहकार्याने पार पडले.
धार्मिक परंपरा जपत पर्यावरण संवर्धनाचा प्रभावी संदेश देणारा हा उपक्रम समाजासाठी प्रेरणादायी ठरल्याची भावना यावेळी उपस्थितांनी व्यक्त केली.
